Kan ou ékri kréol

Dépi kansa mi ékri kréol ? Dépi mwen la swazi !

Amwen, ma la touzour vi papa ékri kréol. Pa osi marké ke la mièn mé kréol kan menm. É ma la zamé tro poz amwen la kestion koman mi té sa ékri.

KWZ, Tangol, Samlong, Lofis La Lang, tousala té parl pa mwen plis ké sa kna mi té marmay.

Sé kan parti ma Québec an 2005 ma la vréman domann amwen koman té i ekri an vréman. Ma la rod kosa té finn fé dési, kel lékritir za ésay mét an plas é akoz la zamé trap domoun.

Mé mon réfléksyon té sa pli lwen la rényon. Ma la pans kréol réyoné kom in kamarad tout bann kréol. Ké sanm tout kouzin kréol nou té konm in gran fami. Gwadloup, Martinik, Guyan, Moris, Sesel, Rodrig, Zamaik, Barbab, Bermid, Cap Ver, Haiti, ké nout tout té i partaz in menm zafér, la lang kréol ! Ké bann kréol fransé té phillipine ek bann kréol anglé.

É la ma la rodé, rodé, rodé bonpé partou si internet war koman bana té i ékri sakinn. É sak la mét amwen, sé ké na in bon pé lé dakor si zot lékri. Néna menm, sé pa menm péi, sé kaziman menm lékri.

Bé a nou ?

Akoz i trap pa. Problém la somanké lé konpliké pou konprann mé na in kestion ma la zamé giny répons sé akoz na in bon pé i vé ékri laksan ? Dépi kansa i ékri laksan in moun ? Akoz in di "li" é lot "lu" i fo batay pou ékri ?
Komsi ou té i di in parisien i ékri pa konm in marseillais akoz li na pwen menm aksan... Alé graté !

Na in lang, laksan lé verbal ! Fors tan tro ral lo bout, la kord la kasé. É la i artrap lo bout kasé, i arral ankor dési pou ki arkas !

Na in pé i di: Mi konpran pa. Lé tro konpliké !
Ma va di aou in trin: la pa bézwen ékri konpliké pou pa i konpran.

Amwen ma la swazi. In lékritir batar rant sak ma la vi anndan lé zot kréol é sak ma la lir terla.

Kan zot va désid azot, ma va swiv...